January 29, 2012

يوم الحد والدنيا هادية


عباد العباد
إذا كنت مؤمن بأيديولوجية معينة أو بشخص معين وماتقدرش تقبل نقد له إعرف إنك عبد لبنى آدم.. فإذا كنت من أنصار الليبرالية ولا تعترف إن الليبراليين فشلوا تماماً فى الإنتخابات لأنهم ركزوا على تشويه الإسلاميين بدل النزول للشارع و لأنهم عملوا زى الأرنب والزحلفة وكانوا فاكرين إن إعلامهم وفلوسهم حا تخلص الموضوع ولأنهم فاهمين إنهم برمات ومش لازم يتعاونوا.. يبقى إنت عبد للقائمين على الليبرالية.. أما لو كنت إخوانجى ومش شايف إنهم سياسيين وبيلعبوها بقذارة السياسة المعتادة.. لو مش شايف إنهم قاموا على وثيقة السلمى عشان بتلتف على إرادة الشعب بس مستعدين يكتبوا الدستور قبل الرئيس ضاربين بعرض الحائط نفس هذه الإرادة فقط عشان يخدموا مصالحهم السياسية.. أو لو مش شايف إنهم نزلوا الميدان فى ذكرى الثورة يحتفلوا عشان كسبوا الإنتخابات وعشان يطفوا نار الثورة.. يبقى إنت عبد للإخوان.. لو معجب بالبرادعى ومش شايف إنه خيبان خيبة قوية وإنه بتاع نظريات وتويتات ولكن مالوش كلمة فى الشارع.. لو مش شايف إن البرادعى آخر إنجازاته كانت من 3 سنين وما عملش حاجة تانية من ساعتها.. إعلم إنك عبد للبرادعى.. وإن كنت شايف إن أبو إسماعيل رجل فاضل ومحترم بس مش قادر تشوف إنه مالوش فى ولا حاجة تانية ولا يفقه شئ فى الإقتصاد أو الزراعة أو حتى السياسة الصح.. لو مش قادر تشوف إنه بينادى بالإعتصام وبعدين ينزل يقعد تلت ساعة ويمشى كأنه روك ستار.. إسمحلى إنت عبد لأبو إسماعيل..
لو إنت أى واحد من دول.. إعلم إنك من جماعة آسفين يا ريس مع إختلاف الريس..


الإخوان ولا السلفيين
أنا علمانى رسمى.. وبالرغم من إنى ممكن ألاقى أوجه إتفاق مع سياسات كتير من الإخوان  وبالرغم من إنى معترض تماماً مع الفكر السلفى فيما يختص بالسياسة وإدارة الدولة.. إلا إنى فى الكام إسبوع إللى فاتوا إكتشفت إن السلفيين بيحترموا كلمتهم وبيقولوا إللى بيعملوه وبيعملوا إللى بيقولوه.. ومهما إختلفت معاهم فى الآخر أنا بتعامل مع حد مبادئه واضحة وصريحة وأهدافه معلنة.. للأسف، كل ما شوف أفعال الإخوان أكتشف إنهم أقرب للحزب الوطنى.. كلام جميل لا تاخد منه حق ولا باطل وماسكين العصايا من النص على جميع المستويات.. وكمان شايف إن السلفيين طيبين ونيتهم صادقة ولسه السياسة ما بوظتهمش..

مسيرات .. أم الإعتصامات
بالنسبة لى يوم 25 يناير 2012 كان يوم قوى.. كان فى مئات الألوف فى الشارع.. المسيرة إللى كنت فيها كملت تدخل قصر النيل لمدة ساعتين ونص.. وكانت واضحة وصريحة.. إحنا عايزين العسكر يمشى.. عجبنى فى المسيرة إنها كانت حاشدة، كانت سلمية، كانت رسالة بسيطة ولكن قوية.. وشايف إن لو فى مسيرة كل أسبوعين أو كل شهر، الأعداد دى حا تنزل.. الرسالة كانت واضحة للمجلس العسكرى ولمجلس الشعب، الناس مش حا تفرط فى حقها تانى.. ولكنى معترض تماماً مع فكرة تكثيف المسيرات وأيام "الثورة".. موضوع الإعتصام وقته إنتهى.. مش كل الناس تقدر إنها تخصص كل الوقت والمجهود ده من حياتها بصفة دورية.. مش بعد سنة من الدربكة واللخبطة.. وإنهاردة أصبح فى مجلس شعب منتخب (مهما كان رأيك فى نزاهة الإنتخابات) ودور الثورة إنهاردة هو الضغط بس مش عن طريق إعتصام فى 3000 نفر..  ولكن عن طريق إنها تثبت إنها مازالت قادرة على الحشد وده مش حا يحصل لو فى مسيرة كل يومين.. وطبعاً مسيرة لوزارة الدفاع دى بالنسبة لى إنتحار سياسى.. لو فى مليونية مرة فى الشهر حا تشوفوا أعداد ما حصلتش..

أرفع القبعة لـــ
حملة "لا للمحاكمات العسكرية".. وحملة "كاذبون".. وحركة الجرافيتى.. واللجان الشعبية.. ومبادرة محليات

ماسبيرو
مش ميعاده دلوقتى.. أولاً لأن الأولوية إنهاردة هو خروج العسكر وتسليم السلطة للمدنيين ودول هما إللى دورهم يطهروا الإعلام.. ثانياً لأن مطلب "تطهير الإعلام" ده مش مطلب.. ده محتاج خطة واضحة وصريحة.. يعنى الإعتصام إللى قدام مسابيرو ده حا يخلص إمتى؟ لما إيه إللى يحصل؟ إيه الطلبات إللى "تطهر" الإذاعة والتليفزيون؟ طيب وحتى لو ماسبيرو إتطهر إيه نظام الأهرام؟ والجمهورية؟ وروزا؟ الموضوع أكثر تعقيداً من مطلب يضغط له بإعتصام..

مبارك
عندى إحساس إن أيامه معدودة..

خيرت الشاطر
ليس عضو مجلس شعب.. وليس له صفة واضحة فى الحرية والعدالة..

نظام رئاسى
بعد دراسة متأنية.. أنا عايز نظام رئاسى له السلطات التنفيذية وبرلمان له السلطات التشريعية ودور مراقبة الحكومة.. مش عايز نظام برلمانى يكون له الصلحيات التشريعية والتنفيذية..

من سنة
كان عندنا كتلة واحدة.. دلوقتى عندنا إخوان وسلفيين وجيش وشارع..
كنت قبل الثورة بأدرس إنى أهاجر من مصر..
كنت أصغر من كده عشر سنين
ما كانش حد بيتكلم فى السياسة وكله بيتكلم فى الكورة.. ما حدش بيتكلم فى الكورة خلاص وكله شغال سياسة

سيناء
شكلها حا تفك مننا كده.. يا أخى يلعن أبو الغباء السياسى..

2 comments:

  1. Really good agree with a lot of points. Thanks for the summary:)

    ReplyDelete
  2. والله الاعتصامات انتهى وقتهامن شهور طويلة بس احنا اللى مش واخدين بالنا

    ReplyDelete